老婆嫌棄「總統鄰居」伊巴謙又搬竇

瑞典「鋒神」伊巴謙莫域又搬屋？伊巴謙帶挈母會FBK巴爾幹勁賺40萬歐元（約401萬港元）後搞出一輪爭議，但佢本人就唔得閒理，皆因佢登陸法國後幾經辛苦先搵到地方落腳，點知老婆嫌棄前總統鄰居薩爾科齊，搞到又要搬竇！
帶挈母會賺401萬
伊巴謙莫域登陸聖日耳門初期，曾經因為太出名屢次被拒租屋，搞到住咗2個月酒店先有地方落腳。高薪厚職嘅伊巴謙揀嘅當然係富貴地段啦，意大利傳媒《ANSA》就爆料，話住喺附近嘅仲包括法國前總統薩爾科齊夫婦添！點知伊巴謙太太居然嫌棄「總統鄰居」，呢位「鋒神」惟有搬多次屋，結果佢哋一家揀咗凡爾賽一個每月4萬歐元（約40萬港元）租金嘅單位，好彩呢間屋比舊寓所距離PSG訓練場更近，伊巴謙練波都方便啲。
伊巴謙喺瑞典球圈中已經係神級人物，瑞典足總更慷慨地發放40萬歐元獎金，畀佢12歲時効力嘅球會FBK巴爾幹，當做培育出呢位傳奇射手嘅回報，但同樣係伊巴謙嘅童年球會馬模BI就出嚟抗議做法唔公平，引起一輪風波，不過佢本人就未有任何回應喇。