前巴塞總監搭路 曼城同紅魔爭哥帥

據英國多份報章報道，曼城再次面臨歐聯分組賽出局，部分球員已經唔再畀面文仙尼，而前巴塞總監碧格列斯坦據報下星期加入曼城管理層，好可能會搭路搵哥迪奧拿揸旗，同曼聯鍊過！
球星作反輪住插文仙尼
曼城喺周中不敵阿積士，米卡李察士率先炮轟文仙尼冇料，雖然大軍由荷蘭返國已經凌晨1點，但文仙尼竟然要球員喺第二朝大清早進行危機會議。據報多名球星喺會議中當面質疑佢嘅戰術同排陣，就連文仙尼引入嘅教練團，都被班人批評對隊波無貢獻。
西班牙《世界體育報》報道，同哥帥勁老友嘅前巴塞總監碧格列斯坦，下周將連同幾名前巴塞高層加入曼城，碧格列斯坦首要任務就係游說哥迪奧拿復出！但《機密報》隨即爆料，話曼聯行政總裁基爾同格拉沙親信日前喺紐約密會哥迪奧拿，即管睇吓碧格列斯坦牙力夠，定費Sir接班人嘅吸引力大啲啦！