莫帥爭歐聯大迷信

搭飛機mark實10D座位
皇馬教練莫連奴表面冷酷自信，但骨子裏原來好迷信，佢今季每次帶隊搭飛機踢作客賽事，都指定要坐10D座位，寓意要為「銀河艦隊」奪取球隊史上第十座歐聯冠軍，決心十足。
莫連奴執教皇馬以來，已協助球隊捧過西班牙盃、西甲及西超盃冠軍，今季最大目標自然係歐聯冠軍寶座。西班牙《馬卡報》發現，莫帥以選擇飛機10D座位，表明心迹，話畀球員知，對呢項歐洲大賽錦標志在必得。咁啱皇馬對上一次捧歐聯，就係十年前，難怪莫連奴許下「十全十美」願望。
《世界足球》最佳教練叫胡
除咗歐聯冠軍外，莫連奴亦有望當選英國《世界足球》最佳教練，佢將同迪馬堤奧、迪保斯基、比爾沙等九位名帥角逐殊榮。最佳球員候選名單方面，C朗、美斯、沙維、派路等人大熱入圍。最令人跌眼鏡係最佳球隊候選名單，竟然冇皇馬同巴塞，預料會成為世界盃及歐國盃盟主西班牙國家隊嘅囊中物。
另外，西班牙傳媒爆料，指皇馬門將卡斯拿斯喺國際足協金球獎投票，頭三位順序分別係沙治奧拉莫斯、C朗及沙維，呢個選擇明顯比較另類。有傳佢純粹考慮友情，巴塞中場沙維係佢嘅老友，所以放下門戶之見，將佢列入前三位。至於將拉莫斯排喺C朗之前，似乎同「私人恩怨」有關，皆因一直傳佢同C朗有心病。