安治輸到忟6.25億斟朗尼

戰歐霸盃不敵利物浦，加強安治圖強決心，將斥天價力斟朗尼！俄羅斯暴發戶安治，昨日凌晨作客0比1輸畀紅軍，賽後體育總監卡路士爆料，球隊將用5,000萬鎊（約6.25億港元）轉會費，以及35萬鎊（約438萬港元）周薪利誘曼聯同朗尼，續以銀彈政策擾亂歐洲球壇秩序！
紅魔回購心口贊助再嗌價
紅軍今仗幾乎盡派主力上陣，最終憑達寧轟入世界波小勝。安治輸波後於A組3仗僅得4分，反映球隊與歐洲列強實力仍有一段距離。卡路士賽後透露，富豪老細克里莫夫有意開水喉收購朗尼：「如果克里莫夫對某球星有興趣，佢會坐言起行。朗尼係世界級球星，每隊波都希望擁有佢，安治想買佢有幾咁奇？」預料安治會於明年一月出手，當然紅魔鬼賣唔賣又係另一回事。
另外，紅魔鬼已向DHL回購訓練波衫心口贊助合約，希望稍後以更高價錢出售。