高層遭問責 雲格耍太極

阿仙奴過去一周接連輸畀諾域治及史浩克04，英超、歐聯兩條戰線都出現危機，球會三大巨頭高安基、希爾伍德及加斯迪斯日前出席股東大會時被勁噓，領隊雲格就話除咗以上兩項錦標，其餘盃賽喺佢眼中都唔及歐聯席位重要，所以冇盃捧唔覺得有咩問題。
阿仙奴對上一次贏得重要錦標係喺2005年，對於球會鬧咗多年錦標荒，雲格解釋因為自己有取捨：「球會每季有五大目標，我嘅排位係英超、歐聯、歐聯資格、足總盃及聯賽盃，如果你想吸引好球員加盟，佢哋唔會問你有冇攞過聯賽盃，而係問你有冇份打歐聯。」阿仙奴下周中將於英聯盃16強作客鬥雷丁，經雲格把口咁講，大家應該知道邊場比賽重要啲喇。
股東唔妥高薪CEO
此外，不少股東喺大會上對球會近年唔肯使錢增兵都有微言，認為球會每年都賣走主力，點解唔攞啲錢買番一些好球員，當中矛頭直指每年領取超過215萬鎊薪金（約2千7百萬港元）嘅行政總裁加斯迪斯，不過加斯迪斯就話球員買賣唔係佢決定：「我哋賺到嘅錢係可以用，由雲格決定點用呢啲錢。」