英軍出繡金版波衫繼續掠水

作為現代足球發源地，明年就係英格蘭足總成立150周年，為咗慶祝呢個咁有意義嘅日子，英足總又巧立名目，推出繡上金色三獅徽章嘅英軍波衫，章下仲有1863-2013同150年嘅金色字樣，呢個「金漆招牌」非常sharp醒。
不過三獅兵團近三年已換咗三款波衫，「換衫」都幾頻密，英足總今次借「牛一」之名掠水，睇嚟英格蘭粉絲又要破財喇！
考慮成立「泰利法」反歧視
至於早前泰利嗰單種族歧視案搞到滿城風雨，最終輕判收場，引起外界好大爭議；英足總主席伯恩斯坦承認佢哋收到好多批評，有見及此就話會考慮成立「泰利法」，修改現有規則，加重對種族歧視者嘅懲罰，有關新規則嘅起草、討論及通過都需要一段時間，預計最快要到下季先開始實施。而泰利剛於歐聯作客薩克達之役，亦戴上反歧視臂章。