腦殘約會Nicki食檸檬

懶理大戰拉隊友睇騷
要踢歐聯大戰又點啫？梗係「潮聖」溝女緊要啲啦！曼城前鋒巴洛迪利不嬲封美國紅爆女Rapper Nicki Minaj做女神，近日Nicki到英國做巡迴個唱，「腦殘」即刻約咗一大班曼城球星，帶齊禮物去撐場，仲想約女神去食飯添。點知Nicki唔畀面，寧願食炸雞都唔應約，呢次「腦殘」認真失威！
今年29歲嘅Nicki Minaj，呢兩年簡直紅到發紫，佢雖然唔算靚女，但就勝在有性格，身材big爆夠晒性感，絕對係「巴神」鐘意嘅類型，難怪巴洛迪利對佢流晒口水。巴洛迪利知道Nicki Minaj嘅巡迴個唱周一去到曼斯斯特，即刻約齊隊友包括赫特、巴利、占士米拿、米卡李察士等捧場，呢班球星懶理大戰在即，個個扮到靚一靚睇騷。當晚佢哋似乎開過會先嚟捧場，個個衣着都採用黑色TONE，齊齊以「酷男」形象出現，不過論搶鏡程度，始終都係「腦殘」最犀利，當晚佢內着白色低胸T恤、外披黑色冷衫、腳踏金色sneaker出現，夠晒搶鏡，一到場就引起哄動。見到女神，巴洛迪利仲即刻做嘢，之前買晒禮物仲book晒靚場，諗住等Nicki做完騷，約對方去撐檯腳。
返房消夜 擺明冇興趣
Nicki不嬲以豪放見稱，當晚唱唱吓，就因身材太勁逼爆衫而露出重要部位，引到「巴神」暈得一陣陣。到佢唱完，巴洛迪利即時向有關方面搭路，希望約Nicki食飯，但後者似乎對「腦殘」冇乜興趣，以非常疲累為理由拒絕應約。之後英國記者仲影到Nicki叫助手去買炸雞做消夜，如果畀巴洛迪利知道，肯定傷心到爆，其實翌晚曼城大軍就要飛到荷蘭，預備作客阿積士嘅歐聯賽事，好心巴洛迪利就溝少陣女啦，事業要緊呀衰仔！