安治438萬周薪撬朗尼

安治世界最高薪斟朗尼！昨晨歐霸盃分組賽，俄羅斯富豪球會安治作客0:1輸畀利物浦，不過佢哋今次英倫之旅似乎另有所圖，總監卡路士證實安治有意收購曼聯前鋒朗尼，甚至願意開出超過35萬鎊周薪嘅「世界第1薪」做籌碼！
紅魔賠錢毀約再斟心口贊助
利物浦憑達寧世界波1:0擊敗安治升上榜首，但焦點反而落喺呢支俄羅斯勁旅嘅總監卡路士身上，佢向記者透露：「朗尼係世上最佳球員之一，而且仲好後生，任何球會都希望得到佢，只要老細想得到，我哋就會採取行動。」
英國《太陽報》指，安治會向曼聯開價5,000萬鎊（約6.25億港元），而且人工會超過陣中王牌伊度奧嘅35萬鎊（約438萬港元）周薪，即係世界最高人工！一直有傳費格遜想賣走朗尼，安治開個價咁吸引，又真係難以抗拒嘅。
事實曼聯最識做生意，2年前破天荒將練習衫嘅心口賣埋廣告，畀DHL以每年1,000萬鎊簽咗，不過曼聯尋日宣布，佢哋賠錢買斷合約，估計係搵到更好賺嘅贊助商接手，認真犀利！